Watoto wakutwa Pori la Vikindu wakifundishwa Ugaidi

Jeshi la Polisi Kanda Maalumu ya Dar es Salaam linawashikilia wanawake wanne na watoto wanne wanaofundishwa uhalifu wa kutumia silaha na mbinu za kigaidi katika kambi zilizomo kwenye misitu ya pori la Vikindu.
Kamishna wa Kanda hiyo, Simon Sirro amesema kikosi cha kupambana na uhalifu wa kutumia silaha na ujambazi cha kanda hiyo, kilifanya operesheni katika msitu huo na kufanikiwa kuwakamata watuhumiwa hao.
Kamanda Sirro ameeleza kuwa awali Polisi walipokea taarifa toka kwa mzazi wa kiume aliyefahamika kwa jina la Shaban Abdallah Maleck mkazi wa Kitunda kuwa ametoroshewa watoto wake wanne na mtalaka wake aitwaye Salma Mohamed anayetuhumiwa kuingizwa kwenye harakati za kigaidi.
Na kwamba baada ya taarifa hizo Polisi walianza kufanya msako katika misitu ya pori la Vikindu.
Amesema kuwa, baada ya watuhumiwa kuhojiwa imedhihirika kuwa watoto hao wameachishwa masomo na kuingizwa katika madrasa ambazo ndizo kambi walizokamatwa chini ya uangalizi wa wanawake.
Amesema watoto hao hufundishwa mbinu za mapigano, namna ya kutumia silaha pamoja na kufunzwa kupora au unyang’anyi kwa kutumia silaha.
Pia hufundishwa kujenga uadui na Polisi, walinzi katika taasisi za fedha, na makafiri.
Aidha, Kamanda Sirro amesema wanawake hao wanaendelea kufanyiwa mahojiano ili kuweza kubaini mtandao mzima ili kutokomeza tabia ya kufundisha watoto uhalifu hususani kwamba wanaochukuliwa ni wale wa kuanzia umri wa miaka minne na kuendelea.


JIUNGE NA eddy blog SASA

Usipitwe!! Jiunge nasi kupitia Facebook,Twitter na Instagram ili kupata habari zote za town! Usikose kujiunga na Youtube kuangalia video zote kali kutoka Eddy Blog Pekee!, kujiunga bonyeza hapa>>>Youtube

Tupe Maoni Yako lakini Usiandike Matusi



 
© Copyright EDDY BLOG | Edwinmoshi Official Blog | Designed By www.peruzibongo.com